چین کی گوانگ ڈونگ ریجنل مینز ہاکی ٹیم 12 سے 30 اکتوبر 2026ء تک پاکستان کا تفصیلی ہاکی دورہ کرے گی
اسلام آبا د(اُردو پوائنٹ اخبارتازہ ترین - این این آئی۔ 16 اگست2026ء) پاکستان ہاکی فیڈریشن نے اعلان کیا ہے کہ چین کی گوانگ ڈونگ ریجنل مینز ہاکی ٹیم 12 سے 30 اکتوبر 2026ء تک پاکستان کا تفصیلی ہاکی دورہ کرے گی ۔پاکستان ہاک

اسلام آبا د(اُردو پوائنٹ اخبارتازہ ترین - این این آئی۔ 16 اگست2026ء) پاکستان ہاکی فیڈریشن نے اعلان کیا ہے کہ چین کی گوانگ ڈونگ ریجنل مینز ہاکی ٹیم 12 سے 30 اکتوبر 2026ء تک پاکستان کا تفصیلی ہاکی دورہ کرے گی ۔پاکستان ہاکی فیڈریشن کے مطابق چینی ریجنل ٹیم کا دورہ پاکستان اور چین کے درمیان ہاکی تعلقات کو مزید مضبوط بنانے، پاکستانی کھلاڑیوں کو مسلسل بین الاقوامی معیار کی مسابقت فراہم کرنے اور دونوں ممالک کے درمیان کھیلوں کے تبادلوں کو فروغ دینے کی کوششوں کا حصہ ہے۔ دورہ پاکستان کے دوران گوانگ ڈونگ کی ٹیم ملک کے مختلف بڑے ہاکی مراکز میں پاکستانی محکمانہ، ادارہ جاتی اور کلب ٹیموں کے خلاف متعدد مسابقتی میچز کھیلے گی۔شیڈول کے مطابق 14 اکتوبر کو ایم پی سی ایل بمقابلہ گوانگ ڈونگ، ایم پی سی ایل ہاکی اسٹیڈیم راولپنڈی،15 اکتوبر کوپاک ڈی ایس بمقابلہ گوانگ ڈونگ، نصیر بندہ ہاکی اسٹیڈیم اسلام آباد،17 اکتوبر کوپاکستان نیوی بمقابلہ گوانگ ڈونگ، نصیر بندہ ہاکی اسٹیڈیم اسلام آباد،18 اکتوبر کوپاک ڈی ایس بمقابلہ گوانگ ڈونگ، واہ کینٹ ہاکی اسٹیڈیم،20 اکتوبر کوپاک ڈی ایس بمقابلہ گوانگ ڈونگ، نصیر بندہ ہاکی اسٹیڈیم اسلام آباد،23 اکتوبر کوپاکستان کسٹمز بمقابلہ گوانگ ڈونگ، ڈی ایچ اے ہاکی اسٹیڈیم لاہور، 24 اکتوبر کوپاک ڈی ایس بمقابلہ گوانگ ڈونگ، اسپورٹس کمپلیکس نارووال،26 اکتوبر کوپاک ڈی ایس بمقابلہ گوانگ ڈونگ، نیشنل ہاکی اسٹیڈیم گوجرہ،27 اکتوبر کوپاک ڈی ایس بمقابلہ گوانگ ڈونگ، ڈی ایچ اے ہاکی اسٹیڈیم لاہور، 29 اکتوبر کواضافی میچ ہوگا حتمی فیصلہ ہونا باقی ہے ، مقام بعد میں طے کیا جائے گا۔ اعلامیہ کے مطابق گوانگ ڈونگ ٹیم کا وفد 12 اکتوبر کو پاکستان پہنچے گا جبکہ 30 اکتوبر 2026ء کو وطن واپس روانہ ہوگا۔پی ایچ ایف کے مطابق طویل دورے سے چینی ریجنل ٹیم کو بین الاقوامی تجربہ حاصل ہوگا، جبکہ پاکستانی ٹیموں کو ملک کے مختلف علاقوں میں ایک مضبوط چینی ٹیم کے خلاف کھیلنے کا موقع ملے گا ۔پاکستان ہاکی فیڈریشن نے دورے کو پاکستان اور چین کے درمیان ہاکی تعاون کو وسعت دینے، باقاعدہ بین الاقوامی روابط کو فروغ دینے اور کھلاڑیوں، کوچز و آفیشلز کے لیے مزید مواقع پیدا کرنے کی جانب اہم قدم قرار دیا ہے۔ فیڈریشن کو امید ہے کہ چینی ٹیم کے دورہ پاکستان سے ملکی سطح پر ہاکی کے فروغ میں بھی مدد ملے گی اور بین الاقوامی مقابلوں کا دائرہ اسلام آباد اور لاہور سے بڑھا کر راولپنڈی، واہ کینٹ، نارووال اور گوجرہ جیسے اہم ہاکی مراکز تک وسیع ہوگا۔پی ایچ ایف کے مطابق چینی وفد، میچز کے اوقات کار اور 29 اکتوبر کے مجوزہ اضافی میچ سے متعلق مزید تفصیلات مناسب وقت پر جاری کی جائیں گی



