کوئٹہ میں جشن آزادی سپورٹس فیسٹیول کے تحت جاری جشن آزادی کرکٹ ٹورنامنٹ اختتام پذیر ہوگیا
کوئٹہ (اُردو پوائنٹ اخبارتازہ ترین - اے پی پی۔ 10 اگست2026ء) محکمہ کھیل حکومت بلوچستان کے زیراہتمام وزیراعلی بلوچستان میر سرفراز بگٹی کے وژن کے تحت کوئٹہ میں جشن آزادی سپورٹس فیسٹیول کے تحت جاری جشن آزادی کرکٹ ٹورنامنٹ ا

کوئٹہ (اُردو پوائنٹ اخبارتازہ ترین - اے پی پی۔ 10 اگست2026ء) محکمہ کھیل حکومت بلوچستان کے زیراہتمام وزیراعلی بلوچستان میر سرفراز بگٹی کے وژن کے تحت کوئٹہ میں جشن آزادی سپورٹس فیسٹیول کے تحت جاری جشن آزادی کرکٹ ٹورنامنٹ اختتام پذیر ہوگیا۔ بگٹی کرکٹ اسٹیڈیم میں نصیرآباد ڈویژن اور قلات ڈویژن کے درمیان کھیلے گئے فائنل میں نصیرآباد ڈویژن نے قلات ڈویژن کو 4 وکٹوں سے شکست دے کر ٹرافی اپنے نام کرلی۔ فائنل میچ میں صوبائی مشیر کھیل و امور نوجوانان بلوچستان مینا مجید بلوچ، پارلیمانی سیکرٹری برائے ٹرانسپورٹ میر لیاقت لہڑی نے خصوصی شرکت کی ان کے ہمراہ سیکرٹری کھیل درا بلوچ اور ڈائریکٹر جنرل کھیل یاسر خان بازئی بھی موجود تھے۔ تفصیلات کے مطابق قلات ڈویژن نے پہلے بیٹنگ کرتے ہوئے مقررہ 20 اوورز میں 185 رنز بنائے اور نصیرآباد کو کامیابی کے لیے 186 رنز کا ہدف دیا۔ جواب میں نصیرآباد ڈویژن نے شاندار بلے بازی کا مظاہرہ کرتے ہوئے مطلوبہ ہدف 17 اوورز میں 4 وکٹوں کے نقصان پر حاصل کیا۔ نصیرآباد کی جانب سے قاضی نجیب نے ایک مرتبہ پھر شاندار بیٹنگ کرتے ہوئے نصف سنچری اسکور کی اور ناٹ آوٹ رہے جبکہ عابد سرکی، زبیر مینگل اور علی بلیدی نے بھی اہم اور میچ وننگ اننگز کھیل کر اپنی ٹیم کی کامیابی میں اہم کردار ادا کیا۔ اس موقع پر مہمان خصوصی نے خطاب کرتے ہوئے نصیرآباد ڈویژن کو شاندار کامیابی پر مبارکباد دی اور کہا کہ جشن آزادی ہمارے لیے اتحاد، یکجہتی اور حب الوطنی کا پیغام ہے۔ جشن آزادی کے موقع پر کھیلوں کے مقابلوں کا انعقاد نوجوانوں کو قومی خوشیوں میں شریک کرنے اور ان کی صلاحیتوں کو اجاگر کرنے کا بہترین ذریعہ ہے۔ بلوچستان کے نوجوان باصلاحیت ہیں اور ایسے مقابلوں سے انہیں اپنی صلاحیتیں نکھارنے کے ساتھ ساتھ صحت مند سرگرمیوں میں حصہ لینے کا موقع ملتا ہے۔ اختتامی تقریب میں فاتح اور رنر اپ ٹیموں میں ٹرافیاں، میڈلز اور نقد انعامات تقسیم کیے گئے۔ فاتح نصیرآباد ڈویژن کو ٹرافی کے ساتھ ڈھائی لاکھ روپے جبکہ رنر اپ قلات ڈویژن کو ٹرافی کے ساتھ ڈیڑھ لاکھ روپے نقد انعام دیا گیا۔



