مصنوعی ذہانت کی کمپنی اوپن اے آئی نے الزام لگایا ہے کہ ایران سے ایک اثر انداز نیٹ ورک چلایا جا رہا تھا جسے ناکام بنا دیا گیا ہے۔
بین الاقوامی میڈیا کی رپورٹس کے مطابق اوپن اے آئی نے ایک بلاگ پوسٹ میں الزام عائد کیا ہے کہ ایران سے منسلک نیٹ ورک نے دنیا بھر کے تقریباً 1 درجن میڈیا اداروں میں 7 جعلی صحافیوں کے لکھے ہوئے کم و بیش 100 مضامین شائع کروائے۔
اوپن اے آئی نے الزام عائد کیا ہے کہ نیٹ ورک چلانے والوں نے مضامین لکھنے، انہیں شائع کروانے کی تجاویز بہتر بنانے، سماجی رابطوں کی ویب سائٹس پر تبصرے تیار کرنے اور اندرونی رپورٹس بنانے کے لیے چیٹ جی پی ٹی کا استعمال کیا، ان اکاؤنٹس کا تعلق ایران سے تھا جبکہ ان کے منتظمین نے اپنے مقام کو چھپانے کے لیے مجازی نجی نیٹ ورک کی سہولت استعمال کی۔