آئی سی سی بگ تھری کے سامنے ڈھیر ، کلب چیمپئن شپ، 4 ملکی منصوبے ختم
لاہور (اردو پوائنٹ تازہ ترین اخبار ۔ 6 اکتوبر 2026ء ) بگ تھری (بھارت، آسٹریلیا اور انگلینڈ) کی اجارہ داری اور ہٹ دھرمی نے انٹرنیشنل کرکٹ کونسل (آئی سی سی) کو ایک بڑے عالمی ٹورنامنٹ کے انعقاد سے روک دیا ہے۔ کرکٹ کی دنیا س

لاہور (اردو پوائنٹ تازہ ترین اخبار ۔ 6 اکتوبر 2026ء ) بگ تھری (بھارت، آسٹریلیا اور انگلینڈ) کی اجارہ داری اور ہٹ دھرمی نے انٹرنیشنل کرکٹ کونسل (آئی سی سی) کو ایک بڑے عالمی ٹورنامنٹ کے انعقاد سے روک دیا ہے۔ کرکٹ کی دنیا سے سامنے آنے والی اس بڑی خبر کے مطابق، آئی سی سی کو اپنے ہی تجویز کردہ منصوبے سے پیچھے ہٹنا پڑا ہے اور اب 2031ء تک کسی نئے کلب ایونٹ کا کوئی امکان نہیں ہے۔ تفصیلات کے مطابق آئی سی سی گزشتہ کئی ماہ سے ایک نیا ورلڈ چیمپئن شپ کلب ایونٹ شروع کرنے کے لیے کوشاں تھا۔ دبئی میں فیوچر ٹور پروگرام (ایف ٹی پی) کی ورکشاپ کے دوران بھی اس منصوبے پر بات چیت کی گئی، لیکن بگ تھری نے اس تجویز کو یکسر مسترد کر دیا۔ انہوں نے واضح کیا کہ سالانہ کرکٹ سیزن میں ایسے کسی نئے ٹورنامنٹ کی کوئی جگہ نہیں ہے۔ آئی سی سی اپنی آمدنی اور کھیل کے دائرہ کار کو بڑھانے کے لیے نئے مقابلوں کی تلاش میں رہتا ہے، جس کی وجہ سے اس کا بگ تھری کے ساتھ اکثر تناؤ رہتا ہے۔ تاہم، حقیقت یہ ہے کہ مالی طور پر بھارت اکیلا ہی سب پر بھاری ہے کیونکہ وہ عالمی کرکٹ کی مجموعی آمدنی کا تقریباً 70 فیصد حصہ پیدا کرتا ہے۔ ٹیسٹ کرکٹ کو دو ڈویژنز میں تقسیم کرنے کا منصوبہ بھی توقعات کے مطابق آگے نہیں بڑھ سکا، البتہ اس میں ایک اہم ترمیم ضرور کی گئی ہے۔ اگلے ایف ٹی پی سائیکل میں ورلڈ ٹیسٹ چیمپئن شپ کو 12 ٹیموں تک توسیع دینے کی تجویز ہے۔ اس تبدیلی کے بعد افغانستان، آئرلینڈ اور زمبابوے کو بھی اس کا حصہ بنایا جائے گا، تاہم آئی سی سی نے ابھی تک ممبر ممالک کو اس کا حتمی پلان جاری نہیں کیا۔ آئی سی سی نے بحث کے لیے چند دیگر تصورات بھی پیش کیے تھے، جن میں ورلڈ کلب چیمپئن شپ،اضافی ونڈوز کے دوران چار ٹیموں کے مابین ٹی20 سیریز ہیں۔ ذرائع کے مطابق چھوٹی کرکٹ ٹیمیں ان مقابلوں میں دلچسپی رکھتی تھیں لیکن بگ تھری نے کثیر الجہتی میچز کھیلنے سے صاف انکار کر دیا۔ بعض حلقوں نے تو آئی سی سی کی ان کوششوں کو زمین پر قبضے کی کوشش سے بھی تشبیہ دی۔ ایف ٹی پی کے اس پورے پلان کو اگلے ماہ بالی میں ہونے والی میٹنگ میں حتمی شکل دی جائے گی۔ دوسری طرف انگلینڈ، آسٹریلیا اور بھارت نے 2031ء تک ایک دوسرے کے خلاف کھیلنے کے شیڈول کو پہلے ہی طے کر لیا ہے اگلی ورلڈ ٹیسٹ چیمپئن شپ کا آغاز اگلے موسم گرما میں انگلینڈ میں ایشیز سے ہوگا، جس کے بعد 30-2029ء میں انگلش ٹیم آسٹریلیا کا دورہ کرے گی۔ انگلینڈ نے 2028ء کے اوائل میں پانچ ٹیسٹ میچوں کی سیریز کے لیے بھارت کا دورہ کرنے پر اتفاق کیا ہے جبکہ بھارت 2029ء میں انگلینڈ جائے گا۔ واضح رہے کہ آئی سی سی کے ٹی وی حقوق کی فروخت کا سائیکل ایف ٹی پی سے تھوڑا مختلف کام کرتا ہے۔ اگلی میڈیا رائٹس کی نیلامی 2028ء سے 2032ء تک کی مدت کے لیے ہوگی، جس کے دوران دو ٹی20 ورلڈ کپ، 2029ء کی چیمپئنز ٹرافی اور 2031ء کا 50 اوورز کا ورلڈ کپ کھیلا جائے گا۔ اہم بات یہ ہے کہ براڈکاسٹرز اگلے معاہدے میں بڑی کٹوتی کرنے جا رہے ہیں جس کی کمی آئی سی سی محدود اور نئے ایونٹ سے پوری کرنا چاہتا تھا جو بگ تھری نے مسترد کر دیا۔



