لاہور (اُردو پوائنٹ اخبارتازہ ترین - این این آئی۔ 28 جولائی2026ء) سکول بیگز مینوفیکچررز ایسوسی ایشن کے ایک وفد نے لاہور چیمبر آف کامرس اینڈ انڈسٹری کا دورہ کیا اور صدر فہیم الرحمن سہگل سے ملاقات کی۔ اجلاس کی صدارت صدر لاہور چیمبر فہیم الرحمن سہگل نے کی جبکہ وفد میں ایسوسی ایشن کے کنوینر محمد یوسف، خالد پرویز، محمد جمیل، عمران خالد، ساجد نسیم، چوہدری عمر، سید زیشان، عبداللہ، شہباز حمید اور دیگر نمائندگان شامل تھے۔ اجلاس کے دوران وفد کے اراکین نے سکول بیگز کی صنعت کو درپیش مسائل اور چیلنجز پر تفصیلی روشنی ڈالی۔ انہوں نے کہا کہ سکول بیگز تعلیمی نظام کا ایک اہم جزو ہیں اور یہ صنعت ملک بھر میں چھوٹے اور درمیانے درجے کے کاروبار کے طور پر وسیع پیمانے پر سرگرم عمل ہے، جس سے لاکھوں خاندانوں کا روزگار وابستہ ہے۔ وفد نے نشاندہی کی کہ گزشتہ کچھ عرصے کے دوران سکول بیگز کی تیاری میں استعمال ہونے والے خام مال اور دیگر ضروری میٹیریل کی قیمتوں میں غیر معمولی اضافہ ہوا ہے، جس کے باعث صنعت شدید دباؤ کا شکار ہے۔ ان کا کہنا تھا کہ اگر بروقت اقدامات نہ کیے گئے تو اس شعبے کی بقا اور ترقی متاثر ہو سکتی ہے۔وفد کے اراکین نے حکومت سے مطالبہ کیا کہ سکول بیگز کی تیاری میں استعمال ہونے والے خام مال اور میٹیریل کی درآمد پر عائد ڈیوٹیز میں نمایاں کمی یا انہیں ختم کیا جائے۔ مزید برآں اس صنعت کو مناسب مراعات اور سبسڈی فراہم کی جائے تاکہ مقامی مینوفیکچررز کو درپیش مشکلات کم ہو سکیں۔ انہوں نے کہا کہ حکومتی سرپرستی اور سہولتوں کی فراہمی سے نہ صرف مقامی صنعت مضبوط ہوگی بلکہ سکول بیگز کی برآمدات میں اضافے کے وسیع مواقع بھی پیدا ہوں گے۔اس موقع پر خطاب کرتے ہوئے لاہور چیمبر آف کامرس اینڈ انڈسٹری کے صدر فہیم الرحمن سہگل نے کہا کہ لاہور چیمبر نے ہمیشہ حکومت پر زور دیا ہے کہ چھوٹے اور درمیانے درجے کے کاروباروں کو زیادہ سے زیادہ سہولیات فراہم کی جائیں کیونکہ یہی شعبہ ملکی معیشت میں ریڑھ کی ہڈی کی حیثیت رکھتا ہے۔ انہوں نے کہا کہ ایس ایم ایز کے فروغ کے بغیر پائیدار معاشی ترقی کا تصور ممکن نہیں۔فہیم الرحمن سہگل نے وفد کو یقین دلایا کہ لاہور چیمبر سکول بیگز انڈسٹری کے جائز مطالبات اور مسائل کو متعلقہ حکومتی اداروں تک مؤثر انداز میں پہنچائے گا اور اس صنعت کے تحفظ، ترقی اور استحکام کے لیے ہر ممکن فورم پر آواز بلند کرے گا۔ انہوں نے کہا کہ مقامی صنعتوں کے فروغ اور کاروباری لاگت میں کمی کے لیے پالیسی سازی وقت کی اہم ضرورت ہے تاکہ صنعتی سرگرمیوں اور برآمدات میں اضافہ ممکن بنایا جا سکے۔ صدر لاہور چیمبر فہیم الرحمن سہگل نے کہا کہ ملک میں مہنگائی، بڑھتی ہوئی پیداواری لاگت، توانائی کے بلند نرخ اور خام مال کی قیمتوں میں مسلسل اضافے نے چھوٹے اور درمیانے درجے کی صنعتوں کے لیے کاروبار جاری رکھنا انتہائی مشکل بنا دیا ہے۔ انہوں نے کہا کہ موجودہ معاشی حالات میں حکومت کو ایسی پالیسیوں پر توجہ دینی چاہیے جو مقامی صنعتوں کے لیے کاروباری لاگت کم کریں، سرمایہ کاری کی حوصلہ افزائی کریں اور روزگار کے مواقع میں اضافہ کریں۔ انہوں نے زور دیا کہ سکول بیگز سمیت تعلیمی شعبے سے وابستہ صنعتوں کو خصوصی سہولیات فراہم کرنا نہ صرف صنعتی ترقی بلکہ تعلیم کے فروغ کے لیے بھی ناگزیر ہے۔